6 ຄຸນສົມບັດເດັ່ນທີ່ມີໃນ Tesla ແອັບພລິເຄຊັນ

Comet Digital Agency Laos / Innovation  / 6 ຄຸນສົມບັດເດັ່ນທີ່ມີໃນ Tesla ແອັບພລິເຄຊັນ

6 ຄຸນສົມບັດເດັ່ນທີ່ມີໃນ Tesla ແອັບພລິເຄຊັນ

ເມື່ອເວົ້າເຖິງລົດໄຟຟ້າ ແນ່ນອນວ່າຊື່ບໍລິສັດ Tesla ຫຼື ຊື່ Elon Must (CEO and product architect)ກໍຈະແວັບເຂົ້າມາໃນຫົວ ແຕ່ມື້ນີ້ເຮົາຈະບໍ່ໄດ້ລົງລາຍລະອຽດກ່ຽວກັບລາວ ເຮົາຈະມາລົມກ່ຽວກັບຜະລິດຕະພັນຂອງ Tesla ທີ່ເປັນໜຶ່ງໃນຟັນເຟືອງທີ່ສຳຄັນທີ່ເຮັດໃຫ້ລົດໄຟຟ້າຂອງ Tesla ເທບຂຶ້ນໄປອີກລະດັບ. ນອກນີ້, ສິ່ງໜຶ່ງທີ່ເຮັດໃຫ້ Tesla ພິເສດ ແລະ ໂດດເດັ່ນຈາກລົດໄຟຟ້າຄ້າຍອື່ນໆແມ່ນແອັບພລິເຄຊັນເທິງມືຖື📱.

ແອັບ Tesla ສາມາດຊ່ວຍໃຫ້ເຈົ້າຂອງລົດ ຕິດຕໍ່ສື່ສານກັບພາຫະນະໄດ້ໂດຍກົງທຸກທີ່ທຸກເວລາຜ່ານໂທລະສັບ ເຊິ່ງແອັບດັ່ງກ່າວສາມາດນຳໃຊ້ໄດ້ກັບລົດທຸກລຸ້ນຂອງບໍລິສັດ ລວມມີ Model 3, Model S, Model X, ແລະ Model Y. ດັ່ງນັ້ນ ຫົວຂໍ້ນີ້ທາງທີມງານ Comet ໄດ້ຄັດເລືອກຄຸນລັກສະນະເດັ່ນໆທີ່ເຈົ້າຂອງລົດ Tesla ສາມາດບັນຊາ ແລະ ສັ່ງການໄດ້ຜ່ານແອັບມາເລົ່າສູ່ຟັງ.

1. Phone key

Model S, Model X ແລະ Model Y ຈະມີກະແຈ (Key Fob)ມາໃຫ້ພ້ອມກັບໂຕລົດ ແຕ່ Model 3 ຈະພິເສດກວ່າລຸ້ນອື່ນໜ້ອຍໜຶ່ງຄືຈະບໍ່ມີກະແຈລົດແຖມມານຳ ເຊິ່ງໝາຍຄວາມວ່າໂທລະສັບຂອງເຈົ້າຂອງລົດຈະເຮັດໜ້າທີ່ເປັນກະແຈ ແລະ ສາມາດຄວບຄຸມພາກສ່ວນຕ່າງໆຂອງລົດໄດ້ຈາກໄລຍະໄກຜ່ານແອັບ.

2. ສະພາບອາກາດ Climate ☀️🌨

ເຈົ້າຂອງລົດສາມາດກວດເບິ່ງອຸນຫະພູມພາຍໃນຂອງລົດໃນຂະນະນັ້ນໄດ້ ພ້ອມທັງກຳນົດອຸນຫະພູມຂອງລົດໄດ້ນຳອີກດ້ວຍ ຕົວຢ່າງ: ໃນກໍລະນີທີ່ອາກາດໜາວເຢັນແບບຕິດລົບ🥶 ເຈົ້າຂອງລົດສາມາດຕັ້ງຄ່າໃຫ້ອຸນຫະພູມພາຍໃນລົດອຸ່ນໄວ້ໄດ້ກ່ອນທີ່ຈະເດີນທາງ ຫຼື ໃນຕອນທີ່ອາກາດຮ້ອນໆແລ້ວຕ້ອງໄດ້ຈອດລົດຕາກແດດໄວ້ເປັນເວລາດົນ ຄິດພາບຕອນທີ່ເຮົາຕ້ອງໄດ້ໃຊ້ລົດໃນເວລານັ້ນ (ມີການສຸກເກີດຂຶ້ນແນ່ນອນ😨😂) ແຕ່ສຳລັບເຈົ້າຂອງລົດ Tesla ແມ່ນສາມາດສັ່ງການເອົາແວ່ນລົງໜ້ອຍໜຶ່ງເພື່ອລະບາຍຄວາມຮ້ອນອອກ ຫຼື ປັບອຸນຫະພູມພາຍໃນລົດໄວ້ກ່ອນການໃຊ້ງານໄດ້.

3. ການສາກໄຟ Charging 🔋🔌

ເຈົ້າຂອງລົດສາມາດກວດເບິ່ງຄວາມຄືບໜ້າຂອງການສາກໄຟໄດ້ແບບ real time ແລະ ຍັງສາມາດສັ່ງເລີ່ມຕົ້ນ ຫຼື ຢຸດການສາກໄຟຜ່ານແອັບໄດ້. ໃນກໍລະນີທີ່ໄຟຈະໝົດເຈົ້າຂອງລົດສາມາດຊອກຫາບ່ອນສາກໄຟ (Supercharger)ທີ່ໃກ້ທີ່ສຸດຜ່ານແອັບໄວ້ກ່ອນໄດ້.

4. ຕໍາແໜ່ງທີ່ຕັ້ງ Location 📍

ເພື່ອເປັນການປະຢັດເວລາເຈົ້າຂອງລົດສາມາດຕັ້ງຄ່າບ່ອນທີ່ຈະໄປໄວ້ລ່ວງໜ້າຜ່ານແອັບ ໃນເວລາທີ່ຂັບລົດໄປແລ້ວລົດກໍຈະພາໄປຕາມແຜນທີ່ທີ່ຕັ້ງໄວ້.

5. Summon

ໃນກໍລະນີທີ່ທ່ານບໍ່ໄດ້ຢູ່ໃກ້ກັບລົດ ແລ້ວຢາກໃຫ້ມັນມາຫາກໍສາມາດສົ່ງຄຳສັ່ງຜ່ານແອັບເທິງມືຖືໄດ້ ແລ້ວລົດກໍຈະຄຳນວນສິ່ງແວດລ້ອມອ້ອມຂ້າງໂດຍໃຊ້ລະບົບເຊັນເຊີ ແລະ ກ້ອງທີ່ມີຢູ່ອ້ອມຮອບຕົວລົດເພື່ອທີ່ຈະສາມາດຮັບຮູ້ໄດ້ເຖິງສິ່ງທີ່ຢູ່ອ້ອມຂ້າງ ແລ້ວສາມາດຫຼີກລ້ຽງສິ່ງກີດຂວາງລະຫວ່າງທາງທີ່ໄປຫາເຈົ້າຂອງລົດ ຄຸນ​​ສົມ​ບັດນີ້ແມ່ນເຮັດວຽກພາຍໃຕ້ເງື່ອນໄຂຫຼາຍຢ່າງຄື ບໍ່ສາມາດໃຊ້ງານໃນຖະໜົນຫຼວງໄດ້ເທື່ອ ຢູ່ໃນໄລຍະທີ່ບໍ່ໄກປານໃດ ແລະ ບໍ່ມີຜູ້ຄົນຍ່າງຜ່ານຫຼາຍ ແຕ່ໂດຍລວມກໍຍັງເປັນຄຸນ​​ສົມ​ບັດທີ່ຄັກຫຼາຍ ຫວັງວ່າໃນອານາຄົດຈະຖືກພັດທະນາໃຫ້ມີຄວາມແມ່ນຍຳຂຶ້ນ.

6. ການຄວບຄຸມ Control 🕹

– ລ໋ອກ ຫຼື ປົດລ໋ອກລົດຈາກໄລຍະໄກ
ໃນກໍລະນີທີ່ເຈົ້າຂອງລົດຕ້ອງການຢາກໃຫ້ໝູ່ໄປເອົາສິ່ງຂອງບາງຢ່າງອອກຈາກລົດແຕ່ວ່າເຈົ້າຂອງບໍ່ໄດ້ຢູ່ໃກ້ກັບລົດ ສາມາດປົດລ໋ອກໄດ້ຈາກໄລຍະໄກ ແລະ ໃຫ້ໝູ່ໄປຈັບເອົາສິ່ງທີ່ພວກເຂົາຕ້ອງການໄດ້ໃນລົດໄດ້ເລີຍ.
– ເປີດໄຟໜ້າ ຫຼື ບີບແກເພື່ອຊອກຫາວ່າລົດຈອດຢູ່ໃສ
ສາຍຂີ້ລືມຕ້ອງມັກໂໝດນີ້ໃນກໍລະນີທີ່ເຮົາໄປຈອດລົດໄວ້ຢູ່ບ່ອນຈອດລົດຂອງສູນການຄ້າ ແລ້ວເຮົາບໍ່ຈື່ວ່າຈອດລົດໄວ້ຢູ່ຈຸດໃດກໍສາມາດສົ່ງຄຳສັ່ງຜ່ານແອັບໃຫ້ລົດສົ່ງສັນຍານໄຟ 🔦 ຫຼື ສຽງ 🔊 ໃຫ້ເຈົ້າຂອງຮັບຮູ້ໄດ້.
– ໂໝດການຈຳກັດຄວາມໄວ Speed limit mode
ໃນກໍລະນີທີ່ມີຄົນຢືມລົດໄປຂັບແລ້ວເຈົ້າຂອງບໍ່ຢາກໃຫ້ຜູ້ຢືມຂັບຂີ່ໄວ ກໍສາມາດຈຳກັດຄວາມໄວຜ່ານແອັບໄດ້.
– Sentry Mode
ເປັນໂໝດທີ່ເຊື່ອມຕໍ່ກັບແອັບໃນໂທລະສັບຂອງເຈົ້າຂອງລົດ ໂດຍໂໝດ Sentry ຈະເຮັດວຽກຜ່ານກ້ອງທີ່ມີຄວາມລະອຽດສູງແບບ 360ອົງສາ ພ້ອມກັບລະບົບເຊັນເຊີອ້ອມຕົວລົດ ເມື່ອເກີດການສັ່ນທີ່ເຊັນເຊີຮັບຮູ້ໄດ້ ຈະສົ່ງຂໍ້ມູນໄປຫາໂທລະສັບຂອງເຈົ້າຂອງລົດເພື່ອໃຫ້ມາກວດສອບ ພ້ອມກັນນັ້ນລົດກໍຈະບັນທຶກວິດີໂອໄປນຳ.

ກໍລະນີສຶກສາ: ເລື່ອງເກີດຢູ່ທີ່ເມືອງ San Francisco ລັດ California ສະຫະລັດອາເມລິກາ ໂດຍ Jed Franklin ທີ່ເປັນເຈົ້າຂອງລົດ Tesla Model 3. ໃນມື້ເກີດເຫດ Jed ໄດ້ຮັບການແຈ້ງເຕືອນຈາກແອັບ Tesla ຂອງລາວຜ່ານ Sentry Mode. ຫຼັງຈາກໄດ້ຮັບການແຈ້ງເຕືອນ ລາວໄດ້ລົງໄປກວດເບິ່ງລົດຂອງລາວແລ້ວພົບວ່າແວ່ນລົດໄດ້ຖືກທຸບແຕກ ແລະ ກໍບໍ່ພົບເຫັນຄົນໜ້າສົງໄສຢູ່ບໍລິເວນນັ້ນ ແຕ່ວ່າ Jed ສາມາດຈັບພາບຂອງຜູ້ຕ້ອງສົງໄສໄດ້ຢ່າງຊັດເຈນຜ່ານກ້ອງໜ້າລົດ ລາວໄດ້ດາວໂຫລດວີດີໂອແລ້ວແຈ້ງຄວາມຕໍ່ເຈົ້າໜ້າທີ່ ເຊິ່ງວີດີໂອທີ່ລົດຖ່າຍໄດ້ຊ່ວຍໃຫ້ເບິ່ງເຫັນຮູບປະພັນສັນຖານຂອງຄົນຮ້າຍ ລວມທັງເລກທະບຽນລົດທີ່ນຳໃຊ້ໃນການກໍ່ເຫດ ເຊິ່ງນຳໄປສູ່ການຈັບຕົວຄົນຮ້າຍມາດຳເນີນຄະດີໄດ້ສຳເລັດ. ໃນກໍລະນີນີ້ສາມາດເຮັດໃຫ້ລູກຄ້າໝັ້ນໃຈໄດ້ເລີຍວ່າລົດ Tesla ແມ່ນມີຄວາມປອດໄພຫຼາຍແຕ່ໃນທາງກົງກັນຂ້າມມັນກໍເປັນການທ້າທາຍພວກຂີ້ລັກທັງຫຼາຍວ່າຖ້າສາມາດລັກລົດ Tesla ໄດ້ສຳເລັດກໍປຽບເໝືອນໄດ້ຮັບໃບຢັ້ງຢືນການເປັນຂີ້ລັກຂັ້ນເທບ😅.

ນີ້ເປັນພຽງຄຸນສົມບັດບາງສ່ວນທີ່ຍົກມາໃຫ້ເຫັນວ່າ Automative Industry ແມ່ນໄດ້ກ້າວໄປອີກຂັ້ນແບບກ້າວກະໂດດ ໂດຍການນຳເອົາແນວຄວາມຄິດ ecosystem ມາປະຍຸກໃສ່ກໍຄື ພຽງໂທລະສັບມືຖືເຄື່ອງດຽວສາມາດຈັດການຄວບຄຸມເກືອບທຸກຢ່າງອ້ອມຕົວຂອງຜູ້ໃຊ້ໄດ້ທຸກທີ່ທຸກເວລາ ໂດຍບໍ່ຈຳເປັນຕ້ອງພົກພາອຸປະກອນເສີມອື່ນໆໃຫ້ຫຍຸ້ງຍາກສັບສົນ.

———————————————————————————————————————

Comet Digital Agency ຮັບອອກແບບ ແລະ ພັດທະນາແອັບພລິເຄຊັນເທິງມືຖືໃຫ້ແທດເໝາະກັບທຸລະກິດ ແລະ ຄວາມຕ້ອງການຂອງທ່ານ

———————————————————————————————————————
ແຫຼ່ງຂໍ້ມູນຈາກ
https://www.tesla.com/en_gb/modelshttps://www.tesla.com/en_gb/models

https://www.marketingoops.com/tech-2/sentry-mode-in-tesla/https://www.marketingoops.com/tech-2/sentry-mode-in-tesla/

https://abc7news.com/5238815/https://abc7news.com/5238815/

https://www.youtube.com/watch?v=RHMWPj_RXLUhttps://www.youtube.com/watch?v=RHMWPj_RXLU

No Comments
Post a Comment